May mandato na ang Bacolod City Police Office director angot sa pagmonitor sang area kun sa diin may sightings sang ginapatihan rebelde nga Communist Terrorist Group (CTGs) sa nasakupan sang Bacolod Police Station 10.
Sa interview sang Bombo Radyo Bacolod kay BCPO Director Police Col. Joeresty Coronica, nagmando na ini sa Bacolod City Mobile Force Company kag Bacolod Police Station 10 nga imonitor kag kadtuan ang mga area kun sa diin nakit-an ang mga armado nga grupo.
Ini bangod indi nila luyag sakyan sang mga rebelde ang mga isyu partikular na subong nga Election period kaangay sang pagpatigayon sang harrasment, extortion activities kag recruitment efforts.
Una na nga ginhatagan sang dugang nga long firearms ang Bacolod Police Station 10 agud mangin preparado hinali nga may magluntad nga pag-atake.
Sila ang nagakoordinar man sa Philippine Army kag may ginapatigayon nga coordinated intelligence gatherings natuhoy sa sightings.
Panawagan sang BCPO sa mga pumuluyo nga mangin alerto kag gilayon nga ireport kun may matalupangdan nga mga makaduluda sa palibot.
