Preparado na ang Bacolod City Police Office sa pagdeploy sang mga personnel para sa pagsiguro sang seguridad kadungan sa pagpatigayon sang Masskara Festival 2026.
Sa interview sang Bombo Radyo Bacolod kay Police Col. Eugene Rebadomia, City Director sang Bacolod City Police Office, duha ka bulan antes ang jump-off sang Masskara Festival sa bulan sang Oktubre may yara na sila sang coordination sa Bacolod Gugma Foundation kag Bacolod City Government.
Suno kay Rebadomia, masobra sa dos mil ka mga police personnel ang ideploy nga ginalakipan sang augmentation nagikan sa Police Regional Office- Negros Island Region kag Police Regional Office 6.
Magluwas sa police personnel may yara man sang dugang nga deployment gikan sa iban nga law enforcement agencies kag mga force multipliers kasubong man ang mga criminology students nga gin-authorize nga mag-upod sa deployment para magsiguro sang seguro sang festival goers.
Suno kay Rebadomia, sa September 30 may patigayunon nga send-off ceremony sa magabantay sa Masskara Festival 2026 kag ginalantaw nga pagatambungan sang 600 police personnel.
Suno sa city director may yara sang duha ka batch sang augmentation force kun sa diin nag-abot na kahapon ang first batch nga gin-deploy halin sa September 27 tubtob October 18 kag ang second batch naman ang para sa October 7 tubtob October 18 nga pagabug-usan sang 761 police personnel gikan sa PRO NIR kag PRO 6.
Nagpahanumdom si Rebadomia sa mga kapulisan nga sa tion sang deployment ginadumilian ang pag-inum kag dapat nakasuksok sang proper uniform.
Panawagan man sini sa mga festival goers nga magkari kag mag-enjoy bangud ang mga kapulisan ang yara agud nga magsiguro sang ila seguridad kag nagpanugyan nga kun may indi amo nga nakita sa palibot magpahibalo gilayon sa mga otoridad.
