Nangin generally peaceful ang assessment sang kapulisan sa ginpatigayon nga Salubong sa Masskara Festival 2023 kagab-i sa Bacolod City Government Center.
Sa interview sang Bombo Radyo Bacolod kay Bacolod City Police Office (BCPO) Director Police Col. Noel Aliño, ginakabig sini nga gamay nga sakripisyo lamang ang pagpulaw sa pagbantay sang 1,035 nga mga Police personnel bangod nangin malinong kag matawhay ang opening salvo.
Magluwas sa mga gin-augment kahapon, ginalauman pa sang mga ini ang pag-abot sang augmentation gikan sa Police Regional Office 6 (PRO-6) sa Oktobre 12, nga magaserbe tubtob na sa pagtakop sang kapiestahan.
Madumduman nga ang Masskara Festival 2023 ang naga-umpisa subong nga adlaw Oktobre 7 tubtob sa Oktobre 22.
Pangabay ni Aliño nga magpabilin nga malinong ang pagsaulog sa kapiestahan.
Paathag sang BCPO Director nga tatlo ka factor ang hugot nila nga ginabantayan ang peace and order sa kabug-usan nga Bacolod ilabi na nga may asod-asod nga kinawatay, ginabantayan man ang tanan sa 61 ka mga Barangay may kaangtanan sa Barangay and Sangguniang Kabataan Elections kag ang pagsug-alaw sa Masskara Festival 2023.
Panawagan ni Aliño nga mag-enjoy sang malinong kag malipayon nga kapiestahan pinaagi sa pagpartisipar kag pagkooperar, bangod ang effort nga ginahimo sang kapulisan kag ang pagbuligay sang tanan, ang agud mahimo nga super city ang syudad sang Bacolod. Samtang…magluwas sa kapulisan ginabanta nagadangat man sa 500 ang mga nag-augment nga force multipliers kagab-i sa pagpatigayon sang Salubong sa Masskara Festival 2023 sa Bacolod City Government Center.
Suno kay Police Major Sherlock Gabana, station commander sa Bacolod Police Station 4 kag Venue Commander sa Bacolod City Government Center, napuno sang security personnel ang area bangod magluwas sa mga nagapalibot sa venue, may-ara man sang mga route security, anti-criminality, intelligence kag Police Community Relations (PCR) Personnel nga yara sa aktibidad.
Magluwas sa mga kapulisan, may mga naka-augment man nga Disaster Risk Reduction and Management Office (DRRMO) Personnel kag iban pa nga rescue groups subong man mga force multipliers.
Bangod sa kadamuon sang augmentation, wala man gilayon nakuha ni Gabana ang kabug-usan nga numero sang security details sa lugar.
Ginpasalig man sini sa mga pumuluyo nga sila ang magaseguro sang safety kag security sa mga luyag maglagaw kag mag-enjoy sang Masskara Festival.
Suno diri, ang mga force multipliers ang bulos-bulos man nga magaduty kada gab-i tubtob na sa pagtakop sang kapiestahan sa Oktobre 22.
Kagab-i, sila ang nagpatigayon naman sang Oplan Bakal Sita kag mga Spot Inspection sa area ilabi na nga kadungan sa kapiyestahan, ginapatuman man ang Comelec Gun Ban.
Gin-athag man ni Gabana nga kada piesta sa syudad sang Bacolod, regular na nga ginadumilian ang mga pointed objects lakip na ang Barbeque sticks, pagpanigarilyo ukon vape sa mga pampubliko nga lugar kag paglagaw bitbit ang botelya sang makahulubog nga ilimnon.
Paathag ni Gabana nga kun sa diin nga kiosko naga-inom didto lamang ini dapat magtinir kag indi na dal-on pa kun diin-diin ang mga botelya.
Samtang sa tion nga makita sang mga kapulisan nga nagabitbit sang nasambitan nga mga butang, gilayon man ang mga ini nga kumpiskaron.
Kadungan sa pagpangimbitar sa pagtambong sa kapiestahan, pangabay man ni Gabana nga magakooperar kag magasunod sa rules and regulations kag do’s and dont’s ang mga magaselebrar sang Bacolod Masskara Festival 2023.
