Nangin madinalag-on kag wala sang dalagko nga insidente sa pagbantay sang Bacolod Police Station 1 sa pagsaulog sang Semana Santa sa mga simbahan.
Sa interview sang Bombo Radyo Bacolod kay Police Major Elmer Bonilla, station commander sa Bacolod Police Station 1, sang Biyernes Santo ang may pinakamadamo nga influx sang mga tumuluo nga nagdugok sa Down Town Area partikular na sa San Sebastian Cathedral.
Bangod ang nasambitan nga adlaw ang highlight sa Semana Santa, ang mga programa nga nag-umpisa alas-3:00 sang hapon ang natapos pasado na alas-12:00 sang kaagahon sang Sabado de Gloria.
Suno kay Bonilla, sila ang nag-augment sang mga kapulisan sa duha ka simbahan nga sakop sa ila area of responsibility, nga ginalakipan sang San Sebastian Cathedral kag Lupit Church.
Magluwas sa kapulisan, may mga nagbantay man nga mga personnel gikan sa Bureau of Fire Protection, City Disaster Risk Reduction and Management Office (CDRRMO) kag madamo nga mga volunteers.
Nangin maayo naman ang assessment sini sa ginpatigayon nga deployment tubtob kahapon Black Saturday, kun sa diin wala sang narecord nga major incidents.
Sa mga deboto nga magapakigbahin pa sa mga religious activities subong nga Easter Sunday, panugyan ni Bonilla nga maghalong kag isecure ang mga pagkabutang.
Pahanumdom sini nga yara ang posibilidad nga samtang sila ang nagapangamuyo, may mga persona nga magagamit sang kahigayunan agud makapangawat.
Panugyan ni Bonilla nga mas maayo kun grupo kun nagalakat, nga makabulig man sa pagdakop sa mga kawatan.
Pasalig sini nga may-ara sang mga nakastation nga mga kapulisan sa San Sebastian Cathedral kag Lupit Church nga mahimo palapitan, inkaso may magkaladula nga mga pagkabutang kaangay sang wallet ukon cellphone.
