Blangko pa ang Bacold City Police Station 3 angot sa mga nagpatay kay Lino ‘Dodoy’ Cuadra sa northbound terminal sa Barangay Banago, ciudad sang Bacolod kagab-i.
Sa interview sang Bombo Radyo kay Police Major Richard Fajarito, station commander sang Police Station 3, wala pa sang persons of interest sa krimen.
Base sa narekober nga empty shells sa crime scene suno kay Fajarito, indi magnubo sa duha ang nagtiro kay Cuadra bangud indi magnubo sa 20 ka fired cartridges ang nakuha sang Scene of the Crime Operatives.
Sang natabo ang krimen suno sa station commander, yara sa Ceres Terminal ang pila ka beat patrollers apang wala na nila nalagas ang Toyota Innova nga ginsakyan sang mga suspetsado bangud nag-ulan kag wala man sang masakyan ang mga pulis.
Sa karon, ginausisa pa sang mga pulis ang background ni Cuadra bangud indi pa matumod kun yara ini sa drug list.
Wala man ini sang iban nga criminal record magluwas nga naulamid sa shootout batok sa duha ka pulis sa beerhouse sa Goldenfields Commercial Complex sang sang December 4, 2012 kun sa diin isa ka pulis ang napatay kag isa ang pilason samtang nasalabat naman ang caretaker sang beerhouse.
Kaupod ni Cuadra sang amo nga tion si Romulo Arseña alyas Kid Ramir nga ginpatay man sang riding-in-tandem suspects sang March 2016 samtang nagasakay sa pick-up sa Barangay Mansilingan, Bacolod City.
Antes ang krimen kagab-i, si Cuadra ang ginhulat sang isa ka babayi sa terminal bangud ginapahayag nga magapadulong sila sa Silay City apang wala na nakuhaan sang identity ang babayi.
