Tubtob sa karun blangko pa ang mga kapulisan sang Bacolod City Police Station 9 sa suspek nga nagtiro patay sa isa ka tricycle driver sa Deca Homes South, Barangay Cabug, Bacolod City sang Abril 25.
Ginkilala ang biktima nga si Teresito Gepilga.
Sa interview sang Bombo Radyo Bacolod kay Police Captain Michael Tuburan, station commander sang Bacolod City Police Station 9, nakaestorya na sini ang asawa ni Gepilga kag ginkumpirmar nga tatlo na ka semana ang nakaligad may yara sang nakabais ang biktima nga isa man ka tricycle driver.
Suno kay Tuburan, isa ini ka gina-analisar sang mga kapulisan sa karun kag mahimo may kaangtanan sa pagpatay sa biktima.
Suno sa station commander, ang biktima ang nagabiyahe sang tricycle sa sulod sang nasambit nga subdivision apang makonsiderar nga ang tricycle sini ang colorum bangud wala sang mga stickers kag mga papeles nga nagapamatuod nga legal ini nga makabiyahe.
Ginpahayag man nga ang biktima ang may lima ka mga kabataan kag natalana nga estoryahon sang mga ini ang tatlo ka mga lalaki nga kabataan sang biktima para sa dugang nga impormasyon nga makatudlo nagpatay sa ila amay.
Wala man sang police record ang biktima kag duha pa lang sila ka tuig nga nagaestar didto bangud una ang mga ini nga nagapuyo sa Barangay 35, Bacolod City.
