May yara sang ipatuman nga personnel screening area ukon entrance kag exit sa mga magasulod sa tagsa ka mga dalan nga nakapalibot sa Bacolod Public Plaza kadungan sang pagbukas subong nga hapon bilang ikaduha nga festival site sa pagsaulog sang Masskara Festival 2023.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, nakahanda na ang tanan nga personnel sang station 1 agud nga magpatuman sang security measure sa tanan nga magpadulong sa downtown area sang ciudad kalakip na ang Bacolod Public Plaza.
Subong nga alas 4:00 ang takna sa hapon, ginsirado na ang dalan San Juan; Rizal; Araneta, San Sebastian kag Cuadra kun sa diin may yara sang entrance kag exits agud nga matsekyar ang nagasulod kag nagagwa sa festival site.
Lain man ang lane sang mga babayi kag mga lalaki samtang ginatsek ang mga bags agud masiguro nga wala sang may makasulod nga may dala nga matalom nga hinaniban ukon iban pa nga delikado nga bagay.
Suno kay Bonilla, ginapractice na sang mga naga-asal sa plaza nga indi matalawis ang barbeque stick agud nga malikawan ang disgrasya.
Nagpanawagan man ini sa mga magapadulong sa Bacolod Public Plaza nga sundon ang mga protocols agud nga mas maenjoy ang Masskara Festival.
