Ginpahayag sang Presidente sang Bacolod City Public School Teachers Federation nga ila pagabatunon kun ano man ang makit-an nga deperensya sa assessment sang K-12 Basic Education Curriculum.
Sa interview sang Bombo Radyo kay Richard Gelangre, sa karun ila pa ginahulat ang final result sang assessment sang Department of Education sa K-12 Curriculum kag nagalaom ini nga kun anuman nga deperensya ang makit-an, ini ang dapat bag-uhon para sa kaayuhan sa gihapon sang mga kabataan.
Suno kay Gelangre, wala ini nakahibalo kun ini ang igaretain, hukson ukon may lainon apang maskin ano ang mangin resulta, nagalaom ini nga ang outcome ang para sa kaayuhan sang mga estudyante kag agud mas palanggaon sang mga ini ang pungsod Pilipinas.
Suno sa iya, naghulam sa multi-lateral agencies ang pungsod sa pag-impose sang K-12 Curriculum sa baylo nga ipadala man sang Pilipinas ang mga skilled technical workers sa iban nga pungsod.
Nagalaom ini nga kun liwaton gid man ang curriculum, kuntani ang tinutuyo sini amu ang para sa national development.
Suno pa diri, dapat mas tutukan ang pagtudlo tuhoy sa agrikultura bangud may mga prediction sang krisis sa ekonomiya.
Nagapanawagan man ini nga magrecruit sang bag-o nga mga manunudlo, guidance counselors, registrars kag school nurse kasubong man ang pagpasaka sang budget sang Dep-Ed.
Ginkumpirmar ni Gelangre nga wala na sa karun ginatulod ang Good Manners and Right Conduct (GMRC) sa eskwelahan kag kuntani ini ang mabalik agud nga makapahanumdum kag makagiya ang mga manunudlo sang maayo nga pamatasan.
Dugang pa sini nga ang mga guidance counselors ang makatrain kag makabulig man sa kinahanglanon sang mga estudyante.
