Nagalaom ang presidente sang Bacolod City Public School Teachers Federation nga mabalik ang ginbuhin nga P10 billion proposed budget sang Department of Education (DepEd) sa 2025.
Sa interview sang Bombo Radyo Bacolod kay Richard Gelangre, bangod ginpasalig na ni President Ferdinand “Bongbong” Marcos Jr, nga marestore ang budget, siya ang nagalaom man nga ini ang tumanon.
Pahanumdom sini nga masami ginapahayag sang DepEd officials ang paghako sang modern technologies sa pagtudlo, nga pagakadtuan sang ginbuhin nga budget.
Dugang pa ni Gelangre nga focus sa karun sang mga Grade 7 tubtob Grade 10 students ang pagpreparar para sa Programme for International Student Assessment (PISA).
Suno diri, may dako nga papel ang computerization sa nasambitan nga test kun sa diin may mga tion nga sila ang pahimuon sang graph sa computer sa pagsabat sang pamangkot.
Paathag sini nga indi kaangay sa nakaandan nga test sa Pilipinas nga multiple choice kag bisan wala nakahibalo, makapili lamang sa A tubtob D, may mga pamangkot sa PISA nga analytical.
Suno kay Gelangre, nga principal sang Bacolod City National High School, sang nakaligad nga tatlo ka semana, ang ila eskwelahan ang nakabatun sang 36 ka bag-o nga laptop.
Kaangay man nga proyekto ang padulongan sang ginbuhin nga P10 billion buget.
Suno kay Gelangre, nga sa pagtake sang PISA, makaluluoy ang mga estudyante nga yara sa malayo nga mga eskwelahan nga indi malab-utan sang computerization.
Apang ang principal ang may pagduhaduha man sa pagbuhin sang budget bangod nagapati ini nga nakahibalo ang mga mamalidha sang importansya sang edukasyon.
Suno diri, kaangay nga ginhungod lamang agud sa ulihi maggwa nga si Marcos amo ang nagsalbar sa Education sector.
