Nagaugyon ang presidente sang Bacolod City Public School Teachers Federation sa desisyon ni Presidente Rodrigo Duterte nga suspendihon ang dry run sang face-to-face classes sa Enero 2021 bangud sa bag-o nga strain sang coronavirus nga una nga nadetect sa United Kingdom.
Sa interview sang Bombo Radyo kay Richard Gelangre, ginakabig sini nga maayo nga development ang tikang ni Duterte bangud wala pa gid subong sang pat-od kun san-o mangin available ang bakuna.
Suno kay Gelangre, maayo gid nga narealisar sang Presidente ang sitwasyon kag ginkanselar ang nauna nga mando bangud kun madayon ang face-to-face classes, wala man sini ginapangayo apang kun may madisgrasya nga estudyante, ang mga manunudlo ukon ang principal ang magasalo sang basol.
Gani pabor gid ini nga indi anay magbalik sa mga eskwelahan ang mga estudyante tubob mangin available na ang COVID-19 vaccine.
