Nagapati ang presidente sang Bacolod City Public Schools Teachers Federation nga indi dapat pag-igamble ang kabuhi sang mga estudyante kag ikonsiderar lang anay ang pagpaiway sang face to face classes samtang wala pa sang bakuna.
Sa interview sang Bombo Radyo kay Sir Richard Gelangre nga Principal man sang Handumanan National High School, wala ini nagakompormi sa pagbukas sang face to face classes kag nagalaom nga patapuson nalang kuntani anay ang school year antes ini padayunon.
Suno kay Gelangre, dapat nga maghinay-hinay ang pungsod bangud kaangay sang South Korea, ila man gilayon nga ginbalik ang face to face classes apang liwat nga ginpaiway bangud sa pagsaka sang kaso sang COVID-19.
Nagapati man ini nga posible nabasahan ni Dep-Ed Secretary Leonor Briones ang nahanungod sang Spanish Flu sang 1918 kun sa diin mas safe ang mga kabataan sang eskwelahan sang sa ila mga panimalay kag ginpahayag nga ini ang bangud may mga nurses kag doctors nga nagamonitor sa mga kabataan sadto.
Sa karun, suno sa iya, indi makasiguro gani indi dapat pagbutang sa risgo ang kabuhi sang mga estudyante.
Gindugang man sini nga mangin dugang pa ini nga ulubrahon sang mga manunudlo bangud imbes nga mafocus na lang sila sa modular kag online learning, mabalik nanaman sa eskwelahan sang pila ka adlaw.
Suno sa iya, kun may yara sang matabo nga malain sa mga kabataan, ang mga manunudlo gihapon ang basulon ilabi na ang mga principal kaangay niya.
Suhestiyon sini nga kuntani tapuson nalang anay ang school year bangud sa summer, posible nga may yara na sang bakuna.
