Ginpahayag sang presidente sang Bacolod City Public Teacher’s Federation, nga naga-upod ini sa tinutuyo ni Senator Sherwin “Win” Gatchalian nga pag-ban sang paggamit sang cellphone sa sulod sang classroom para sa mga elementary kag senior high school students apang nagpabutyag man ini nga mangin mabudlay ang pagdumili sang mobile phones sa mga kabataan.
Sa interview sang Bombo Radyo Bacolod kay Richard Gelangre, wala sang problema nga i-regulate ang paggamit sang estudhyante sang cellphone, magluwas nalang kun ang manunudlo magagamit sang teknolohiya sa klase.
Suno diri, nakit-an nga dako ang nangin bulig sang gadgets kag internet sang pandemic amo nga indi mahimo ang total banning sang cellphone.
Suno pa kay Gelangre, ang mga kabataan sa karun ang nagdako nga nangin kabahin na sa ila ang gadgets nga kun hinali lang nga kuhaon ang gadgets sa ila, ini ang daw kaangay nga sila ang ginkuhaan sang kabahin sang ila kabuhi.
Paathag sini, maayo ang tinutuyo ni Senator Gatchalian, apang ini ang mabudlay indi lamang sa manunudlo nga maga-enforce ini sa mga estudyante apang kasubong man sa estudyante nga naanad na nga naggamit sang cellphone.
Pahayag ni Gelangre, kun luyag nga matinluan ang paminsaron sang bata, nagapanawagan ini sa mga telecommunication companies nga dulaon ang mga porn sites kag i-edukar ang mga kabataan sa husto nga paggamit sang teknolohiya.
