Maga-apelar si Mayor Evelio “Bing” Leonardia sa National Inter-Agency Task Force (NIATF) batok sa pagpasaka sang community quarantine status sang syudad sang Bacolod nagikan sa General Community Quarantine (GCQ) padulong sa Modified Enhanced Community Quarantine (MECQ).
Suno sa ginpagwa nga pahayag ni Bacolod City Mayor Bing Leonardia, kagab-i lamang niya nabaton ang impormasyon nga ginrekomendar ang Bacolod City nga ipaidalom sa MECQ sumugod sa Hulyo 16, Biyernes, kag iya ginpasiguro nga maga-apelar ini sa NIATF nga dapat indi pagpadayunon ang pagpaidalom sa MECQ.
Ginpabutyag man sang alkalde nga madamo na sang Bacolodnon ang nawad-an sang trabaho bangud sang pagpatuman sang community quarantine kag indi na masarangan pa ang dugang nga restrictions, nga maga-atrasar sang pagbangon sang ekonomiya.
Suno kay Leonardia, nagnubo na sang 42 percent ang COVID-19 cases sa syudad sa nakaligad nga duha ka semana kag padayon sila nga magapakigbato sa pandemya, upod sa mga frontliners, samtang padayon nga ginatinguha-an nga makabangon.
Nagalaom naman ini nga pamatian sang NIATF ang ila nga pag-apelar.
