Ginahaylo sang officer-in-charge sa Tourism Office sa ciudad sang Bacolod ang tanan nga mga hotel owners kag management nga magkuha na sang certificate to operate.
Nahibaluan nga gin-anunsyar sang damlag lang ni Tourism Secretary Bernadette Romulo-Puyat nga mahimo na maka-operate sang full capacity ang mga hotel nga yara sa idalom sang general community quarantine kag modified GCQ.
Sa interview sang Bombo Radyo Bacolod kay OIC Tourism Officer Sandra Ruth Sycip, ginpahayag sini nga dapat na mag-apply ang mga hotel owners agud makakuha sang certificate to operate.
Pananglitan nga indi pa makapasa sang tanan nga mga requirements nga nalakipan sang letter of intent, sworn statement of undertaking, 2020 mayor’s permit kag mga litrato sang hotel kun sa diin nagapakita nga nagasunod ini sa proper health protocol, hatagan lang ang mga hotel owners sang probational certificate to operate.
Suno kay Sycip, kinahanglan gid nga makapasa sang mga requirements ang mga hotel antes maka-operate agud masiguro ang safety sang mga bisita.
Dugang pa sini nga sa DOT Region 6 gid idiretso pasa ang mga requirements paagi sa email kag maga-assist lamang sila sa DOT-Bacolod.
Nahibaluan nga 28 sa 85 ka mga hotel karon sa Bacolod ang naga-operate na.
