Ginhatagan pa sang isa ka kahigayunan sang pinuno sang Bacolod Traffic Authority Office (BTAO) ang isa ka traffic enforcer nga nakuhaan sang litrato sang netizen nga wala nagasuksok sang helmet samtang naga-angkas sa motorsiklo.
Sa interview sang Bombo Radyo Bacolod kay BTAO Head Patrick Leonard Lacson, nakabalik na sang Marso 6, sa pagduty ang nasambit nga traffic enforcer matapos nga ginsuspend bangud nakuhaan sang litrato nga nagaangkas sa motorsiklo samtang wala nagasuksok sang helmet.
Suno kay Lacson, ang BTAO personnel ang nagpangayo sang pasaylo kag nagpasalig nga indi na ini magliwat sa paglapas sang traffic rules.
Nagpanugyan man ini sa tanan nga personnel sang BTAO nga magsuksok sang proper uniform kag magsunod sa traffic rules.
Suno kay Lacson, ang mga traffic enforcers ang dapat mangin role model sang mga pumuluyo sa pagsunod sang traffic rules.
