Ginakabig sang chairman sang local inter-agency task force (LIATF) sa syudad sang Bacolod nga maayo nga balita ang pagpaidalom sang syudad sa alert level 1 humalin bwas, Martes, Marso 1, 2022.
Suno kay Vice Mayor EL Cid Familiaran maayo nga balita ilabi nagid sa business sector ang pagpaidalom sa Alert level 1 ukon new normal.
Suno diri ang mga business establishment ang makaakomodar na sang 100 percent capacity.
Ginpahayag man sini nga wala pa man ini sang ideya kun pagabatakon na ang liquor ban.
Suno kay Familiaran ang curfew naman ang nakadepende pa bangud ang tagsa ka Local Government Units (LGU) ang may kaugalingon nga ordinansa angot sa curfew.
Apisar sa level status sang syudad, nagpanugyan ang bise alkalde nga ipabilin ang pagsunod sang minimum health protocols kaangay sang pagsuksok sang face mask kag pagmaintenar sang social distancing kag indi dapat magkompiyansa bangud ara sa gihapon sa palibot ang COVID-19.
