Ginapakamaayo ni Vice Mayor El Cid Familiaran ang pagbalik sang administrasyon ni President Ferdinand “Bongbong” Marcos Jr. sa nationwide contest sa pagpatahum-tahom sang mga local government units (LGUs).
Nahibaluan nga ginpanawagan sang Presidente ang mga LGUs nga mag-upod sa “Kalinisan sa Bagong Pilipinas” program.
Suno kay Familiaran, ini kuntani ang pagpadayun na lamang sang programa nga napatuman na sadto apang bangod sa lain nga prayoridad sang administrasyon, napauntat ang pagpatuman.
Sadto, naggrand slam naman ang Bacolod City sa nationwide clean-up contest.
Suno diri, kaangay nga nagbalik sa basics ang administrasyon, apang ginapakamaayo man sini nga ginbalik ang programa agud mas mangin matinlo ang palibot nga maka-attract sang madamo pa nga mga investors kag turista.
Dugang pa sini nga ang programa ang makabulig man agud mangin healthy ang mga pumuluyo sa sosyodad.
Ini ang kaangay man sa mga programa sang gobyerno kaangay sang “Tulong Panghanapbuhay sa Ating Disadvantaged/Displaced Workers (TUPAD)” kag Assistance to Individuals in Crisis Situation (AICS) sang Department of Social Welfare and Development (DSWD).
Kun sa diin sa pagpaninlo sa mga LGUs sa idalum sang programa, sila ang ginahatagan man sang sweldo nga magamit sang ila tagsa ka pamilya.
Ginaduso man sang bise alkalde nga mapasanyog ang mga clean up drive sa mga baybayon kun sa diin depende sa kadamuon sang sako nga mapuno ang makuha nga bayad.
Sa pihak nga bahin, aminado naman si Familiaran nga kaangay nga ningas kugon lamang ang implementasyon sang mga LGUs sa Single Use Plastic ordinance.
Suno diri, kun ginpadayun ang programa, ini ang mangin gawi na sang mga pumuluyo nga ila himuon bisan nga wala sang nagasaway.
Nagalaom si Familiaran nga masuguran na ang programa kag ini ang magapadayun para sa kaayuhan sang ciudad.
