Ginpahayag ni Bacolod City Vice Mayor El Cid Familiaran nga nadula na ang iya respeto para kay Iloilo City Mayor Jerry Treñas kasunod sang ginpagwa sini nga executive order nga nagadeklarar kay Familiaran nga persona non grata sa ciudad sang Iloilo.
Sa interview sang Bombo Radyo Bacolod kay Vice Mayor El Cid Familiaran, iya ginkakibot ang EO nga ginpagwa ni Treñas nga suno sa iya ang respeto sini para sa alkalde, nadula na.
Suno diri, santo sa EO, siya kuno mismo ang nagmando sang pagpasaylo sa mga badjao sa Iloilo gikan sa Bacolod.
Gin-athag ni Familiaran nga wala siya nakahibalo nga nakasakay na sa roro ang mga badjao bangud iya ginmandoan ang Department of Social Services and Development (DSSD) nga tiponon kag sundon ang proseso nga ini man nahibaluan sang pinuno sang DSSD.
Pahayag ni Familiaran, ang husto diri nga buluhaton amo nga tipunon kag ibutang sa isa ka holding area ang mga badjao samtang ginaporseso ang ila dokumento pabalik sa ila nga lugar sa Mindanao.
Naghatag man ini sang suhestyon sa DSSD nga dapat may yara sang Information Education campaign nga nagahingyo sa publiko nga untatan ang paghatag sang kwarta sa mga badjao nga nagapangalimos agud sila mag-untat kag magpauli balik sa ila lugar.
Isa pa gid sa suhestyon sini amo nga kun mahimo nga makasohan ang mga lideres sang mga badjao nga kun basi mga sindikato.
Apang, aminado ini nga may yara sang lapses sa trabaho sang DSSD sa pagpapabyahe sa 80 ka mga badjao nga papapulion kun tani sa Mindano apang sila nanaog sa Iloilo City kag ini ginpangayuan sang bise alkalde sang pasensya.
Para kay Familiaran, indi sini mabaton nga tawagon nga “stupid” sa publiko kag aminado man ini nga siya nakabalos man sang tinaga, apang indi man insulto ang ginbuya sini para sa alkalde.
Luyag pa kun tani sini nga makig-angot kay Treñas apang naggwa na ang isyu gani nagdesisyon ini nga maghipos nalang.
Sa karun wala sang plano si Bacolod City Vice Mayor El Cid Familiaran nga magkomunikar kay Iloilo City Mayor Jerry Treñas, nga suno kay Familiaran iya na ginpasesnya kag ginapanagmuyoan si Treñas.
Kahapon nagpagwa sang official statement si Mayor Albee Benitez may kaangtanan sa conflict sa tunga nanday Familiaran kag Trenas.
Suno kay Benitez, Hunyo 21, nakabaton ang Bacolod City Anti-Mendicancy Task Force sang reklamo nagikan sa security guard sang warehouse sa Bacolod Reclamation Area may kaangtanan sa presensya sang mga badjao sa lugar.
Bangud sini, gin-istorya sang task force ang 80 ka mga persona sa lugar.
Pagkatapos sang interview kag evaluation sang Department of Social Services and Development, majority sang mga pamilya ang naghingyo nga sila ang papaulion sa ila lugar.
Bangud sini, sila ang ginbuligan sang city government paagi sa ila nga pagbayad sang ila nga pamasahe sa roro vessel.
Bangud sa madamo nga mga pamilya nga ginhandle sang task force, napaslawan ang task force nga magcoordinate sa probinsya sang Iloilo may kaangtanan sa pag-abot sang mga pamilya nagikan sa Bacolod.
Bangud sini, naghingyo si Benitez sang pasaylo sa provincial government sang Iloilo kag kay Iloilo City Mayor Jerry Trenas bangud sa kapaltahan.
Ginpasalig man sang alkalde nga indi na maliwat ang nasambit nga mistake sa palaabuton agud nga mapabilin ang harmonious relationship sa tunga sang Bacolod kag Iloilo City.
