Ginakasubo sang bise alkalde sa ciudad sang Bacolod nga wala gid matalakay sa State of the Nation Address (SONA) ni President Ferdinand ‘Bongbong’ Marcos Jr. ang paghatag sang solusyon sa problema sa sektor sang transportasyon.
Sa interview sang Bombo Radyo Bacolod kay Bacolod City Mayor El Cid Familiaran, wala gid nakahatag sang win-win solution ang Presidente apisar nga dako ang problema sang mga drivers, operators, management sang kooperatiba ukon korporasyon kag mga commuters nga ginakulang sang masakyan.
Madumduman nga si Familiaran ang nagpadulong sang nakaligad sa Kongreso kag Senado agud ipadangat ang complaints kag panawagan sang mga transport groups sa ciudad sang Bacolod may kaangtanan sa public utility vehicle (PUV) modernization program.
Sa karun ang problema ang nadugangan pa matapos nag-ibwal ang pila ka mga reklamo sa tunga sang management sang kooperatiba kag korporasyon sa ila nga mga miyembro.
Sa pihak sini, ginapakamaayo man sang Bise Alkalde ang pagban sa Philippine Offshore Gaming Operators (POGOs) nga nagatuga sang madamo nga negatibo nga epekto sa ekonomiya kalakip na ang madamo nga mga krimen.
Ginapakamaayo man ni Familiaran ang pagpanindugan ni Marcos nga atun ang West Philippine Sea nga makaboost sa morale sang mga Pilipino, Armed Forces of the Philippines kag mga mangingisda.
Gindayaw man sini ang war on drugs accomplishments sang Marcos Administration nga indi kaangay sa Duterte Administration, manubo ang kaso sang pinatyanay.
Dako man nga butang ang gin-anunsyar nga salary increase sa mga government employees kalakip na ang mga manunudlo.
Apisar nga wala maathag kun pila ang isaka sa sweldo, ginpahayag ni Marcos nga ini ang ihatag sa apat ka tranches.
Nagpasalig man ang Presidente sang Accident Insurance para sa mga manunudlo, kag ginpalab-ot kay Education Secretary Sonny Angara nga dapat magfocus sa quality education.
Ginpasakaan man ang subsidy para sa nga cancer patients, apang panawagan ni Familiaran nga dapat matutukan kun paano maprebentar ang mga balatian.
