Nagpanindugan si Bacolod City Vice Mayor El Cid Familiaran nga indi patas kun maghambal ang mga tawo nga wala nagaubra ang mga pulis rason kun ngaa wala nagakasolbar ang krimen sa ciudad.
Sa interview sang Bombo Radyo kay Familiaran, ginpahayag sini nga madamo sa karun sang mga spekulasyon sa mga nagaluntad nga pagpangluthang sang riding-in-tandem suspects sa Bacolod City kag nalakip diri ang kaangtanan sa illegal nag druga, personal grudges, love triangle kag negosyo.
Suno sa iya, nagapabilin sa kapulisan ang pag-imbestigar kag pagsolbar sang krimen agud mahatagan sang hustisya ang pamilya sang mga biktima.
Suno diri, multi-tasking sa karun ang ginahimo sang mga otoridad bangud sila man ang nagapatigayon sang contact tracing sa COVID-19.
Naintindihan man sini ang sentimento sang mga pumuluyo apang nagahingyo ang bise-alkalde nga paminsaron man kun matuod gid bala nga nagapanago ang mga pulis kag indi ang sabat diiri.
Suno sa iya, yara lang sa kapin 600 ang mga pulis sa ciudad gani naintidihan man sini nga indi nila ini masarangan.
Nagapadayon man sila sa pag-ayo sa national kag regional headquarters nga dugangan ang mga kapulisan sa ciudad apang kun pila lang ang ila ipadala, amu lang man ini ang pagabatunon sang ciudad.
