Nagpanawagan si Vice Mayor El Cid Familiaran, nga karun Acting Mayor sa Bacolod City nga maghalong kag mangin responsable kasunod sa confirmed cases sang Monkey Pox sa Iloilo kag Glanders disease sa Siquijor.
Suno sa bise alkalde, may meeting nga ginpatigayon kaupod si Councilor Kalaw Puentevella chairman sang Committee on Health and Sanitation, Secretary to the Mayor Atty Marty Go, City Health Office kag iban pa nga concerned agencies angot sa pagprebentar sa pagsulod sang nasambit nga mga balatian sa ciudad.
Suno diri, ipatuman ang information dissemination agud mapahibalo ang publiko kun ano ini nga mga sakit, kun ano ang sintomas kag kun ano ang dapat nga himo-on.
Sa karun nga nagahilapit na ang pagbukas sang klase, yara na sa Department of Education ang pag-edukar sa mga kabataan angot sa MPOX kag Glanders disease.
Igamonitor man sang CHO ang mga hotel, spa, market kag terminals kun sa diin masami nga nagatipon ang mga tawo.
Nagpasalig man si Familiaran nga may yara sang itukod nga task force kun may yara na sang ginasuspetsohan nga kaso.
Nagpanawagan ini sa publiko nga maghalong kag mangin reponsable nga kun may yara sang makit-an nga sintomas sang sakit nga MPOX kag Glanders disease magpalapit na gilayon sa doktor.
Samtang may yara na sang ginpasar nga resolution ang Sangguniang Panlungsod sang ciudad sang Bacolod angot sa pagprebentar sa pagsulod sang sakit nga Monkey Pox sa ciudad.
Ang resolusyon ang gin-author ni councilor Jason Villarosa.
Suno sa konsehal, nagapanawagan ini sa tanan nga ahensya nga mangin responsable kag maghimo sang tikang agud indi makasulod ang sakit sa Bacolod City.
