Nabatun na sang Bacolod City Government ang pasidungog para sa Seal of Good Local Governance (SGLG) award gikan sa Department of the Interior and Local Government (DILG).
Sa interview sang Bombo Radyo Bacolod kay Bacolod City Vice Mayor El Cid Familiaran, ang SGLG Award ang tuigan nga assessment sang DILG kag sila ang may-ara man sang ginabasihan nga criteria nga dapat pasaron sang local government unit.
Kalakip sa criteria ang Disaster Preparedness, Social Protection and Sensitivity, Health Compliance and Responsiveness, Education, Business Friendly, Order, Competitiveness kag iban pa.
Gikan sa 1,716 ka mga LGUs, ang Bacolod City Government ang nalakip sa masobra lamang 400 nga nakapasar.
Paathag ni Familiaran nga ang mga makapasar ang makabatun sang additional bonus sa masunod nga tuig samtang may-ara naman sang evaluation sa kada departamento sa kun sin-o ang makabatun.
Ang mabatun nga bonus ang indi pwede nga maglapaw sa 50 percent sang sweldo sang empleyado gani ini ang sa nagkalainlain nga balor indi kaangay sa Collective Negotiation Agreement (CNA) bonus nga palarehas ang balor nga mabatun.
Suno sa bise alkalde ini pa lamang ang ikaduha nga SGLG Award nga nabatun sang Bacolod City Government humalin sang 2015.
Ginpakigbahin man sini nga may mga LGUs man nga naggrand slam na kaangay sang ciudad sang San Carlos nga pito ka beses na nga nakabatun sang SGLG Award.
Apang suno diri kalabanan sa mga dalagko nga LGUs ang wala nakasulod bangod sa COVID-19 pandemic kun sa diin nafocus ang mga pondo sa health kag napabay-an ang iban nga areas of concern.
Gani ginakabig ni Familiaran nga mapalarun ang ciudad nga nakaupod sa masobra 400 nga nakapasar kag hatagan sang cash reward nga P2.3 million.
Apang nakadepende naman sa alkalde kun paano ini pagagamiton.
Suno kay Familiaran, ini ang mahimo gamitun sa mga areas kun sa diin nangin manubo ang ratings sang City Government.
Pahayag sang bise alkalde nga maayo nga programa ang SGLG Award agud ma-encourage pa ang mga Chief Executive nga magperform.
