Nagpasalamat sa pagsalig kag nagpromisa sang doble nga effort si Bacolod City Vice Mayor-elect Claudio Jesus “Kalaw” Puentevilla.
Kahapon, ginpatigayon na ni outgoing Vice Mayor El Cid Familiaran kay Puentevilla ang gavel bilang presiding officer sa Sangguniang Panlungsod.
Sa interview sang Bombo Radyo Bacolod kay Puentevilla, dako ang pasalamat sini sa Ginoo bangod sa kahigayunan nga ginhatag sa iya kasubong man sa pagsalig sang mga pumuluyo kag nanday Mayor-elect Greg Gasataya kag Congressman-elect Albee Benitez.
Suno diri, sa tatlo ka tuig nga pagserbisyo bilang konsehal, siya ang nakapasar na sang 15 ka ordinansa.
Pasalig sini nga siya ang magaserbe nga ‘working vice mayor’ kag doblehon pa ang efforts.
Suno diri, palarehas ang ila nga dereksyon kag commitment nga padayunon ang mga nasuguran nga programa sang Benitez administration.
Dugang pa ni Puentevilla nga indi lamang nila padayunon kundi pasanyugon pa ang mga nasugdan nga programa.
Paathag sini nga ang tatlo ka tuig nga termino sang Benitez Administration ang tuman ka nubo para sa pagpatuman sang mga programa, apang maathag kag makit-an ang natuga na sini nga mga pagbag-o.
Isa sa makabig pinakadako nga legasiya, nga iya man adbokasiya, amo ang pag-expand sang Bacolod City Comprehensive Health Program (BacCHP) agud ma-avail sang tanan nga Bacolodnon.
Sa karun, masobra 95,000 na ang miyembro sang BacCHP, masobra 20,000 na ang naka-avail nga nagdangat na sa masobra P150 million.
Una naman nga nagpasalig sa Benitez nga bilang kongresista, siya ang magapangita sang dugang nga pondo para sa programa.
Sa pihak sini, pasalig ni Puentevilla nga ipadayun nila ang live telecast sang Sangguniang Panlungsod, kag pangagda sini sa mga pumuluyo nga padayun nga magmonitor sa mga programa sang ciudad.
