Wala pa sang narecord nga evacuees sa mga Barangay sa Bacolod City.
Sa interview sang Bombo Radyo Bacolod kay Bacolod City Disaster Risk Reduction and Management Office Head Dr Ma. Laarni Pornan, luwas sa mga stranded passengers nga yara sa Education and Training Center School III (ETCS 3), wala pa sila sang narecord nga nag-evacuate sa mga designated evacuation centers sa tagsa ka Barangay.
Suno diri, pugtak pugtak lamang ang mga nagluntad nga ulan, apang may pila ka flood prone barangays nga nagplastar na sang safety line ukon lubid nga sarang mahawiran sang mga pumuluyo kun magbaha.
Dapat man nga areglahon na sang mga may trabaho sa mga himata sini nga mabilin sa balay kun sa diin sila magakit-anay inkaso magdalom ang baha.
Ini bangod balantayan pa ang ala-1:00 sang hapon tubtob alas-7:00 sang gab-i nga high tide.
Panugyan ni Pornan nga unahon gid nga masafety ang mga kabataan, senior citizen, person with disability kag nagabusong.
Suno naman kay Earl Edward Ramirez, Chief Operations Officer sang Bacolod CDRRMO, nga ginlibot nila ang nanarisari nga mga Barangay partikular na ang mga malapit sa suba kag coastal areas apang wala pa sang may nag-evacuate.
Ang Bacolod Communications Office ang nakapagwa naman sang updated nga evacuations sites para sa tagsa ka Barangay.
Suno kay Ramirez, kalabanan Barangay Hall ukon Day Care centers ang evacuation site sang mga numbered barangays.
Samtang sa mga named barangays naman, sila ang magagamit na sang mga eskwelahan kun madamo na sang maga-evacuate.
Ginabantayan man nila ang water level sa mga suba kag sapa, nga may gamay pa lamang nga pagtaas.
Panawagan nila sa mga pumuluyo nga magkooperar kun may panugyan na sang preemptive evacuations kag indi na hulaton pa nga magsaka ang tubig-baha nga mangin mabudlay na ang pagrescue.
