Ginalauman nga matigayon bwas nga adlaw, Pebrero 2, ang pagpirmahanay sang kontrata sa tunga sang Bacolod City Water District – Primewater kag sang bulk water supplier sa ciudad sang Bacolod.
Suno kay Bacolod City Mayor Alfredo Abelardo Benitez, may yara sang duha ka kontrata nga ginpadala sa BACIWA kag Primewater para ireview.
Ginahingyo sini ang General Manager sang BACIWA, Mona Dia Jardin, kun mahimo nga matigayon bwas ang contract signing.
Luyag sang alkalde nga matapos na sini nga semana ang mga issues agud matigayon na ang contract signing.
Suno kay Benitez dapat mahatagan sang pagtamod ang kakulang sang supply sa ciudad nga suno sa BACIWA may yara sila sang kulang nga 20 MLD ukon millions of liter per day sang tubig.
Matapos ang permahanay sang kontrata, pagalantawon sang alkalde kun ano man ang mangin kabudlayan sa pagconstruct kaangay na lamang sang right of way kag iban pa.
Pahayag ni Benitez, pagalantawon sini kun malab-ot ang 6 months nga deadline sa pag-connect sang bulk water sa prime water piping network.
