Ginakalipay ni Bacolod City Councilor Celia Flor, chairperson sang Committee on Senior Citizen and Veterans Affairs sa Sangguniang Panlungsod ang pagpasar sang Senado sa 3rd and final reading ang hagna nga makahatag oportunidad sa mga senior citizens nga makatrabaho sa pribado man ukon pampubliko nga institusyon.
Para sa konsehal welcome development ang House Bill 10985 ukon Employment Opportunities for Senior Citizens and Private Entities’ Incentives bangod kadam-an sa mga katigulangan ang may ara na sang mas dako nga experience sa trabaho.
Panindugan sini nga dapat wala sang discrimination sa oportunidad sa trabaho, kag pahanugutan gihapon bisan senior citizen basta may-ara lamang sang medical certificate nga ini ang physically fit sa trabaho.
Ini man ang rasun nga bisan senior citizen ang ginalakip gihapon sa benepisyaryo sang Tulong Panghanapbuhay sa Ating Disadvantaged/Displaced Workers (TUPAD) cash for work program sang Department of Labor and Employment (DOLE).
Aminado ini nga bisan wala sang layi, may anti-discriminatory policy naman nga nagapahanugot sa pagtrabaho sang senior citizen kag persons with disability (PWD), apang mas maayo man kun may-ara nagid sang layi.
