Ginkompirmar sang pinuno sang Coast Guard Station Negros Occidental nga wala sang kanselasyon sa byahe sang Bacolod-Iloilo vice versa apisar sang pagpasirado sang borders sang probinsya sang Iloilo.
Sa interview sang Bombo Radyo kay Commander Jansen Benjamin, ginpahayag sini nga kadungan sang pagpasira sang borders sang probinsya sang Iloilo, ang Bredco Port to Dumangas vice versa ang mangin apektado.
Apisar sini, wala gihapon sang kanselasyon sa byahe bangud nagapadayon ang pagpadala sang mga essential goods.
Suno kay Benjamin, sumugod Hulyo 4, kinahanglan na nga magpasa sang mga travel documents ang mga locally stranded individuals (LSI) kaangay sang travel authority kag medical certificate.
Sa mga residente sang Bacolod, suno sa iya, kinahanglan magkuha sang mga dokumento sa City Health Office kag papermahan sa station commander sang estasyon kun diin ini napaidalum.
Suno sa commander, indi naman maapektuhan ang byahe halin Bacolod City to Iloilo City vice versa.
Ginpahayag man sini nga yara sila gihapon sa hightened alert status agud masiguro nga wala sang may makasulod nga infected sang virus.
