Nasuguran na ang diskusyon sang Emergency Operation Center (EOC) sa syudad sang Bacolod natuhoy sa preparasyon agud nga indi makasulod ang variant of concern nga B.1.1.529 ukon ang Omicron variant.
Suno kay Dr. Chris Sorongon, Deputy for Medical sa Bacolod EOC, ila ini nga gindiskusyunan kaupod kay Bacolod City Mayor Evelio “Bing” Leonardia kag isa sa ila ginalantaw nga tikan amo ang pag-estrikto sang border.
Ikaduha diri amo ang hugot nga pag-obserbar sa minimum health protocols.
Hingyo naman sang doktor sa mga ginikanan nga may mga kabataan nga 11 anyos panubo nga indi pa mabakunahan, nga kun mahimo indi lang ang mga ini anay dal-on sa mga malls ukon mga lugar nga masami ginadugok sang tawo.
Magapagwa man ang EOC sang guidelines natuhoy sa pagselebrar sang mga christmas party kag iban pa nga mga events ilabi na nga nagahilapit ang holiday season kalakip na ang pagcarolling.
Pahanumdom ni Sorongon nga bisan damo na nabakunahan kag yara na sa alert level 2 ang syudad sang Bacolod, indi man sang tanan luyag nga liwat nga magsurge ang COVID-19 infection.
Paathag sang doktor nga indi na nila luyag nga magsaka pa ang kaso sang COVID-19 agud magpabilin lang nga manubo ang alert level status sang syudad agud nga indi matam-an sa restriksyon ang mga Bacolodnon kag makahulag na ang ekonomiya.
Luyag sang mga ini nga magpadayun ang pag-uswag sang Bacolod City ilabi na nga ang syudad ang nakabatun sang award nga Most Business-Friendly City sa Pilipinas.
Ginpaathag ni Sorongon nga maipakita sang syudad nga makasustiner ini pinaagi sa pagpartisipar sang mga Bacolodnon sa vaccination program.
