Ginawelcome kag ginakabig nga maayo nga development sang Bacolod Emergency Operations Center ang pagpaidalum sang National Inter-Agency Task Force sa COVID Alert Level 1 ang ciudad sang Bacolod humalin Marso 1 tubtob Marso 15, 2022.
Sa interview sang Bombo Radyo kay EOC Director Em Ang, ginakalipay sini nga ginpaidalum na sa Alert Level 1 ang ciudad bangud ini ang ginahulat agud nga magbukas ang ekonomiya kag maka-operate na 100 percent ang establishmento kag mga negosyo.
Suno sa iya, ini agud man nga makabalik na sa trabaho ang mga pumuluyo nga nadisplaced bangud sa mga restrictions.
Suno diri, dako ini nga improvement sa bahin sa pagbukas sang ekonomiya kag pagbalik sang mga aktibidad sa Bacolod pati na ang face to face classes.
Suno kay Ang, handa naman sa transition ang Bacolod City kag ginapreparar na ang mga logistics ilabi na sa bahin sang mga isolation facilities bangud pagabawiun na sang Department of Education ang mga public schools nga ginagamit bilang isolation kun magsugod na ang face-to-face classes.
Madutay naman ang kaso kag mild na lamang ang sintomas sang mga positibo kun sa diin ginapahanugutan na ang home isolation nga supervised sang mga barangays.
Sa karun suno sa executive director, ginadihon na ni Mayor Evelio “Bing” Leonardia ang executive order tuhoy sa pagpaidalum sang ciudad sa Alert Level 1 kag diri mahibaluan kun may i-ammend ang alkalde sa mga ordinansa nga ginapatuman sa ciudad.
