Ginakonsiderar sa karun sang Bacolod City Government ang posibilidad sang pagpatigayon sang Festival of Lights kadungan sa opening ukon closing sang Batang Pinoy 2026 nga i-host sang Bacolod City.
Ang Batang Pinoy 2026 ang maga-umpisa Disyembre 12 tubtob 18.
Nahibaluan nga una na nga na-anunsyar nga kadungan sa opening sang Batang Pinoy 2026, idungan man ang Parade of Stars para sa Metro Manila Film Festival nga i-host man sang ciudad.
Sa interview sang Bombo Radyo Bacolod kay Bacolod City Councilor Jason Villarosa, chairperson sa Committee on Tourism sa Sangguniang Panlungsod, ginalantaw nila nga madungan na lamang ang Festival of Lights agud isa na lamang ka crowd kag isa nalang ka petsa ang selebrasyon.
Ang Festival of Lights ang ginapatigayon sang STI-West Negros University nga ginsuguran sang 2018.
Ini sadto ang ginapatigayon kada Disyembre 1, tubtob nga na-amyendahan ang resolusyon kag ginpahanugutan na ano man nga petsa sa bulan sang Disyembre.
Indi naman kinahanglan nga magpirma pa sang panibag-o nga agreement sa Philippine Sports Commission bangod ini ang local activity lamang sang ciudad.
Suno kay Villarosa, mas maayo kun matingob na lamang ang mga programa agud isa na lamang ka crowd.
Nahibaluan nga 207 ka local government unit ang nagpalista nga makigbahin sa Batang Pinoy, kun sa diin ginalauman nga magadangat sa 45,000 ang mangin bisita sang ciudad.
