Ginpasalig ni Bacolod City Vice Mayor El Cid Familiaran nga wala sang may nakasalamuha nga city officials si Bacolod City Fire Marshal Chief Insp. Rodel Legaspi matapos ini nga nagpa-Boracay upod ang iban nga mga BFP personnel kun sa diin isa sa mga ini ang nagpositibo sa COVID-19.
Suno kay Familiaran, mas nauna nga ginpatigayon ang courtesy call ni Legaspi sa Bacolod Government Center antes ini nag-apas sa Boracay sadtong Hunyo 13 upod ang apat pa gid ka mga fire marshal sang Silay, Cadiz, Bago kag San Carlos.
Dugang pa sang bise alkalde nga pagbalik sang lima ka mga fire marshal, gindiretso ang mga ini dala sa Bago City quarantine facility.
Nahibaluan nga ginpaidalom na ang kapin 200 ka mga naka-closed contact sa BFP personnel nga nagpositibo sa swab test kag naka-quarantine sa karon.
Ginrelieve naman ang 28 ka mga BFP personnel sa Western Visayas lakip na ang Regional Director nga si Fire Senior Supt. Roderick Aguto bangud sa paglapas sa quarantine protocol.
Ginbutang naman bilang caretaker sang BFP-6 si Fire Senior Supt. Jerry Candido.
