Nagahanda na ang Bacolod Firecracker Retailers Association sang ila nga mga kiosko sa likod sang Pope John Paul II Tower sa reclamation area agud nga makasugod sa pagbaligya sa Disyembre 15.
Sa interview sang Melchor Deriada, member sang Board of Directors sang Bacolod Firecracker Retailers Association, ginauna ang pagplastar sang kiosko kag ginacomply man ang nagakaigo nga permits agud nga wala sang problema sa pagbaligya.
Nagpaidalom man sila sa nagakaigo nga seminar kag training antes nahatagan sang permit.
64 tanan ang miyembro sang asosasyon kag kun wala naman sang problema sa ila nga pagproseso sang permit, makasugod na sila sa pagbaligya sa Disyembre 15.
Tinalikdan nga tuig, 62 lang ka miyembro sang asosasyon ang nagbaligya bangud nagpahuway ang duha.
Kalakip sa mga ginahanda sang mga ini ang tubig, balas, fire extinguisher kag may gwardya man nga nagalibot agud nga safe ang mga vendors.
Suno kay Deriada, duha ka metros ang antad sang kada kiosko.
P50,000 ang arkila sang asosasyon sa lugar sa reclamation area kag tungaon nila ini nga 64, samtang wala pa diri nalakip ang gasto sa pagpatindog sang kiosko nga indi magnubo sa P6,500.
Ang mga retailers ang magabaligya sa reclamation area halin Disyembre 15 sang hapon tubtub Disyembre 31 sang gab-i.
Ang supply nga ginabaligya nanday Deriada ang nagikan sa banwa sang Hinigaran samtang may yara man sang nagikan sa Barangay Vista Alegre.
Nagalaom naman ini nga maubos ang ila nga baligya bangud ang iban diri ang ila lang nga gin-alsada bangud indi man tanan ang maiguan sang ila nga capital.
Nagsaka naman ang presyo sang palupok bangud sa pagsaka sang raw materials kun sa diin nagnubo ang kadamuon sang ginamanufacture.
