Ginapasalamatan ni Bacolod City Mayor Alfredo “Albee” Benitez nga gilayon nga ginpamatian ni Iloilo City Mayor Jerry Treñas ang request sini nga irecall ukon bawion ang ginpagwa nga Executive Order nga nagadeklarar kay Bacolod City Vice Mayor El Cid Familiaran nga persona non grata.
Kahapon, ginpanawagan sang alkalde sa alkalde sang Iloilo City ang pagbatak sa mandato sa panindugan nga kinahanglan ang kooperasyon sang duha ka magkaingod nga local governments.
Gilayon man nga nagsabat kahapon si Treñas nga nagpahayag nga apisar wala personal nga nagpangayo sang pasaylo si Familiaran, iya na nga bawion ang EO para na lamang kay Benitez.
Nagpanawagan naman si Benitez nga magmove-on na gikan sa issue.
Nag-ugat ang issue sang ginbyahe padulong sa Iloilo ang 80 ka mga Badjao nga ginpangsikop gikan sa Bacolod City.
Apang imbes nga magbyahe pabalik sa Zambaonga, nagpanaog ang mga Badjao sa Dumangas Port kag nakadangat ang iban sa mga ini sa Iloilo City nga ginkaakig naman ni Treñas.
Ini ang ginbasol ni Treñas kay Familiaran, nga nagapungko bilang acting mayor, apisar nga wala sang ihibalo ang Bise Alkalde sa lihok sang Department of Social Services and Development (DSSD).
Sa kaakig, ginpangsikop man ni Treñas ang mga gina-alegar badjao nga nagikan sa Bacolod kag nagpabalik sang 72, apang sa pagmonitor sang DSSD, natukiban nga 15 lamang sa mga ginbyahe ang orihinal nga kabahin sa ginpatabok nga 80, kag iban sa mga ini ang may business permit pa kag School ID nga naka-address sa Iloilo.
Sa interview sang Bombo Radyo kay Vice Mayor El Cid Familiaran, ginpahayag na lamang sini nga ang tanan ang pagbuot sang Ginoo.
Suno diri, natapos na ang issue kag wala naman ini sang kalain sang buot, gani indi naman kinahanglan nga magpadulong pa ini sa Iloilo City agud makahinun-anon kay Iloilo City Mayor Jerry Treñas.
