Ginkumpirmar sang Philippine Coast Guard (PCG) Station Negros Occidental nga nag-umpisa na kaina sang kaagahon ang suspensyon sang byahe halin sa Iloilo City padulong sa Negros Island vice versa.
Suno kay PCG-Negros Occidental Commander Capt. Ludovico Librilla nagpakig-angot na ini sa management sang fastcraft kag roro para sa implementasyon.
Madumduman nga kadungan sang pagsaka sang quarantine status sang Iloilo City sa modified enhanced community quarantine (MECQ), kalakip man diri ang pagpatuman sang travel moratorium humalin alas-12:01 kainga sang kaagahon tubtob sa Mayo 31 sa byahe sang barko padulong kag pabalik sa Negros Island.
Paathag ni Librilla nga para lang sa mga leisure traveler ukon mga non-essential travel ang pagbawal sa pagsulod sa Iloilo City apang pahanugutan gihapon nga makasulod ang mga Essentials kag Autorized Person Outside Residence (APOR).
Pahanumdom naman ni Librilla nga may kinahanglan lang ang mga ini nga icomply nga mga requirements, nga kaangay man gihapon sa nakaligad nga gina-impementar sa ciudad sang Iloilo.
Paathag sini nga ang Executive Order ni Iloilo City Mayor Jerry Treñas kun sa diin ginabawal ang pagbyahe sang mga barko gikan sa Iloilo City padulong sa Negros Island kag vice versa ang nagapabilin lang sa sea port nga sakop sang ciudad.
Pahanumdom sini nga sarang gihapon nga makasulod ang mga Bacolodnon kag Negrense sa Panay Island pinaagi sa Dumanggas Port nga sakop na sang probinsya sang Iloilo.
Apang nagapabilin naman nga pahanumdom ni Librilla nga kun wala naman sang importante nga buluhaton, mas maayo nga indi nalang magtabok tubtob sa ma-lift na ang travel moratorium.
Ginarespeto ni Bacolod City Councilor Renecito Novero ang desisyon sang Iloilo City sa pagsuspend sang byahe nga Iloilo-Negros Island vise versa.
Suno kay Novero, indi man sini luyag nga mauntat ang byahe apang indi naman ini makahusga sa sitwasyon sang Iloilo City.
Paathag sini nga ang makadeterminar lang sang sitwasyon sang ciudad amo ang ila mismo nga local government unit (LGU).
Nagapati naman ini nga ang desisyon ang makabulig kag makahatag sang nagakaigo nga proteskyon kag balanse sa recovery sang ekonomiya.
Panugyan naman sang konsehal nga respetuhon nalang ang desisyon bangod makadali lang man ini nga panahon pagahemuon.
Aminado naman ini nga may backlash sa ekonomiya ang temporaryo nga suspensyon sang byahe kag ang pagsaka sang quarantine status sang Iloilo City sa modified enhanced community quarantine (MECQ).
Dugang pa sini nga labi nga maapektuhan ang mga negosyante sa sektor sang nagahatag transportation services padulong kag pabalik sa Iloilo City.
Suno kay Novero, dapat nga kabigun nga gyera ang pagpakig-away sa COVID-19 kun sa diin indi malikawan ang kabudlayan kag tanan ang imbulbado.
Apang pasalig naman sang konsehal nga wala malakip sa suspensyon sang byahe ang byahe sang barko padulong sa Dumangas port gikan sa Bacolod bangod indi na ini sakop sang Iloilo City.
