Ginkompirmar ni Bacolod City Mayor Evelio “Bing” Leonardia nga nagsugtanay sila ni Iloilo City Mayor Jerry Treñas nga may yara sang free flow sea travel sa tunga sang Bacolod City kag Iloilo City sugod subong, Hunyo 16.
Suno kay Leonardia, nag-istoryahanay sila sa telepono ni Treñas kag nahisugtan ang free flow sang sea travel apang wala nadala diri ang mga nagabyahe nagikan sa Manila kag Cebu padulong sa Bacolod via Iloilo City kag vice versa.
Ang nasambit nga tikang ang nadesisyunan bangud ang duha ka mga ciudad ang lunsay napaidalum sa community quarantine category.
Suno sa iya, magahimo ang mga ini sang joint declaration agud mas maklaruhan ang parameters sang nasambit nga arrangement.
Kagab-i, nagpagwa man sang Executive Order No. 43 si Leonardia nga naga-extend sang modified general community quarantine (MGCQ) sa ciudad sang Bacolod halin Hunyo 16 tubtob Hunyo 30, 2020 kasunod sang deklarasyon sang Malakanyang.
