Ginahulat na lamang sang Bacolod City Government kun maghatag sang approval ang Environmental Management Bureau – Negros Island Region nga mahaboy sa Cell No. 5 sa Bacolod Sanitary Landfill sa Brgy Felisa ang mga basura gikan sa old dumpsite sa Barangay Mandalagan.
Sa interview sang Bombo Radyo Bacolod kay Bacolod City Mayor Greg Gasataya, late 90s pa sang sugod nga ginhaboyan sang basura ang old dumpsite, tubtob nga ginsuguran na ang Bacolod Sanitary Landfill sa Brgy Felisa sang 2008 tubtob 2009.
Bangod wala na ginagamit ang old dumpsite, ang propedad ang ginbaligya na sang tag iya sa lainlain nga kompanya.
Ang iban ang wala na nagtandog sang duta, tubtob nga may duha ka property owner nga nag-umpisa sa pagtukod sang building nakaligad nga duha ka tuig.
Aminado si Mayor Greg nga madamo na sang nagacontact sa ila nga nagapamangkot sang mahaboyan sang basura.
Ini man ang umpisa sang paghaboy sang mga basura sa Brgy Punta Taytay, Old Bacolod Airport sa Brgy Singcang-Airport kag sa Brgy Sum-ag, nga nagresulta sa madamo nga issue.
Pahayag ni Mayor Greg nga sila ang nagmando na sang pag-untat sang movements ukon paggwa sang mga basura gikan sa Old Dumpsite.
Kahapon, nagsugilanon naman sila upod sa EMB, property owners kag ila mga abogado, kag ang contractor nga nagatukod sang building sa area.
Isa sa suhestyon sang contractor nga matapos magbalik ang test result sa toxicity level nga ginpadala pa sa Cebu, iseggregate ang mga plastic agud ini lamang ang ihaboy sa Cell No. 5.
Aminado si Gasataya nga ginsuggest na sadto nga mahaboy sa Cell No 4 ang basura, apang ginakahangawa nga ini ang matiphag kun maglapaw na sa maximum capacity.
Samtang humalin tinalikdan nga tuig, ginhikutar na ni Mayor Greg ang pagpangita sang iban nga alagyan nga labayan sang garbage truck.
Ini bangod sa mga reklamo sang pumuluyo sa pag-usbong sang baho sang garbage truck sa paglabay sang Brgy Felisa proper.
Suno kay Mayor Greg may nakita na nga routa nga mas madasig para sa mga garbage truck nga makaderetso sa sanitary landfill.
Natumod na ang mga tag-iya sang duta nga labayan, kag ginahikutar pa nga ini ang mabakal sa ila, apang mas maayo pagid kun idonar na lamang ang duta.
