Ginapreparar na sang Local Government Unit sang ciudad sang Bacolod kag Bacolod City Health Office ang tanan nga kinahanglan agud nga malikawan ang monkey pox kalakip na ang vaccines kag isolation facilities.
Sa interview sang Bombo Radyo Bacolod kay Vice Mayor Elect kag Councilor Claudio Jesus “Kalaw” Puentevella, Chairman sang Committee on Health and Sanitation sa Sangguniang Panlungsod, sa koordinasyon kay Bacolod City Mayor Alfredo “Albee” Benitez, nagsapol na sila kag ang City Health Office ang magapanguna sa preparasyon agud malikawan ang nasambit nga balatian.
Suno kay Puentevella, ang City Health kag si Department of Health Undersecretary Dr. Mary Ann Maestra ang nagpahayag nga wala sang sintomas sang monkeypox sa ciudad sang Bacolod.
Suno diri, ang CHO ang nagpagwa naman sang awareness sa mga airports kag seaports nga may kaangtanan sa nasambit nga balatian.
Ginpahayag man sini nga may yara naman sila sang ginpreparar nga listahan sang task force engkaso nga may marekord nga kaso sang balatian sa ciudad.
Nagpanawagan man ini nga mangin responsable sa pagpalapta sang nagakaigo nga impormasyon nga may kaangtanan sa monkeypox kag likawan ang pagpalapta sang misinformation kag fake news.
