Halos apat ka libo ka sako sang bugas ang natalana nga baklon sang Bacolod City Government para sa ikaduha nga tranche sang pagbaligya sang P20 per kilo nga bugas.
Sa interview sang Bombo Radyo Bacolod kay Secretary to the Mayor Atty Marty Go, ginapreparar na nila ang purchase request matapos nga maghatag sang go signal si Bacolod City Mayor Greg Gasataya.
Madumduman nga masobra singko mil ang ginprocure nga bugas sa 1st tranche.
Suno kay Go, P13 million ang budget nga gintalana para sa programa, kun sa diin P7 million ang nagamit sa una nga implementasyon.
Ang nabilin sa balor amo ang ibakal sang 3,980 ka sako sang bugas para sa 2nd tranche.
Tinguhaan man nila nga matigayon ang pagbakal antes matapos ang bulan sang Agosto.
Tun-an pa nila ang effeciency sang ginhimo nga pagbaligya sa 1st tranche kun ini man ang gamiton nga implementasyon para sa 2nd tranche.
