Nagpanguna ang ciudad sang Bacolod sa may pinakamadamo nga recoveries sa coronavirus disease kahapon nga adlaw bangud sa 128 ka mga na-ayo sa respiratory disease.
Sa COVID-19 Case Bulletin No. 179 nga ginpagwa sang Department of Health Western Visayas, 216 ka panibag-o nga mga infections ang narekord kahapon kun sa diin 76 ang nagikan sa Iloilo City; 47 sa Negros Occidental; 36 sa Bacolod City; 26 sa probinsya sang Iloilo; 15 sa Capiz; siyam sa Aklan; anum sa Guimaras; kag isa sa Antique.
184 naman ka mga recoveries ang nareport sa rehiyon kun sa diin 128 ang nagikan sa Bacolod City; 34 sa Negros Occidental; tag pito sa Capiz kag Iloilo City; anum sa probinsya sang Iloilo kag duha sa Antique.
13 ang nadugang sa fatalities kun sa diin 10 ang nagikan sa Bacolod; duha sa Negros Occidental kag isa sa Iloilo City.
Sa kabug-usan may yara na sang 9,789 ka mga kaso sang COVID-19 sa Western Visayas kun sa diin 3,783 ang aktibo; 5,839 ang nag-alayo kag 167 ang nagkalamatay.
Ang Bacolod City ang may yara na sang 3,360 ka mga infections samtang 2,523 naman ang kabug-usan nga kaso sa Negros Occidental.
