Pormal na nga ginsuguran ang house-to-house vaccination sang Emergency Operation Center sa syudad sang Bacolod sang Martes.
Suno kay Em Legaspi Ang, Executive Director sa EOC, nagpangayo na ang mga ini sang master list sa tagsa ka mga baragay kag punong barangay sang mga wala pa mabakunahan nga residente ilabi na ang mga bedridden, may comorbidities kag senior citizens nga yara na sa 80 anyos pasaka.
Ang mga ginalista amo ang mga indibidwal nga mabudlayan na sa pagpadulong sa vaccination centers, gani ang mga vaccinators na mismo ang nagapadulong sa mga ini.
Sakay sa Mobile Vaccination Clinics ukon Vaccination Taxi, ginaschedule ang mga vaccinators sa pagbakuna.
Samtang, may regular schedule naman sa Vax-i ang mga dalagko nga barangay sa Bacolod kag ang mga unvaccinated ang masami nga ginatipon nalang sa barangay hall.
Suno kay Ang, ang mga nakabutang sa masterlist kag ginakadtuan sa kada panimalay ang nauna naman nga nagpabutyag sang kagustuhan nga mabakunahan.
Apang, magluwas sa mga unvaccinated nga wala pa malab-utan sang pagbakuna, may iban naman nga indi gid luyag nga mabakunahan.
Masami ang mga ini ang may kinaiya nga ginapatihan, ukon nagpati sa sala nga impormasyon.
Suno kay Ang, ang mga indi nila makumbinser sa pagpabakuna ang gintugyan nalang sa mga opisyales sang barangay nga mas nakakilala sa mga ini kaangay nalang sa mga purok presidents nga ginapabulig sa pagkumbinser.
Apang bangod sa indi mandatory ang vaccination, aminado naman si Ang nga indi nila mapilit iban apang ginatinguhaan man nila ini nga mapapati.
Luyag sang EOC nga mapakita nga ang COVID-19 vaccination ang nagahatag gid sang adisyunal nga protreksyon.
Paathag ni Ang nga naga-average sang kapin 100 kada adlaw ang ila mabakunahan sa vax-i gikan sa gin-upod nga bedridden, senior citizen kag mga na reach-out nga pumuluyo.
Pasalig man sang Executive Director nga may nagakaigo nga supply sang COVID-19 vaccines sa syudad kag may-ara kita sang nanari-sari nga brands.
