10,000 ka dugang nga doses sang Sinovac COVID vaccines ang nabaton sang ciudad sang Bacolod kaina sang aga kag ini ang ginpadala sang national government.
Nagikan sa Bacolod Silay Airport, gilayon nga gindala ang bakuna sa cold storage sa Bacolod Government Center.
Sa interview sang Bombo Radyo kay Bacolod City Administrator Em ang, magaresume sa masunod nga semana ang rollout sang first dose sang Sinovac vaccines para sa mga pumuluyo nga nalakip sa A1, A2 kag A3 priority groups.
Ini ang ginalakipan sang health frontliners, senior citizens kag may yara sang comorbidities.
Suno kay Ang, may test run kuntani ang Negros Occidental sang vaccination sang mga nalakip sa A4 sa Lunes apang nagpagwa sang instruction ang Department of Health Region 6 nga hulaton ang guidelines para sa A4 category.
Bangud sini, iga-saturate nalang ang vaccination sang mga nalakip sa A1, A2 kag A3.
Sang tinalikdan nga semana suno sa city administrator, lunsay second dose ang gin-administer sa Bacolod.
Suno sa opisyal, nangin positibo ang response sang national government sa hingyo ni Mayor Evelio Leonardia nga maga-allocate sang bakuna para sa ciudad sang Bacolod.
Nagalaom naman si Ang nga makabaton ang Bacolod sang dugang nga bakuna sa masunod nga mga inadlaw.
As of June 4, kabug-usan nga 37, 150 doses sang COVID-19 vaccines ang naadminister sa Bacolod.
Ini ang ginalakipan sang 15, 432 doses sang Sinovac vaccine kag 21, 718 doses sang AstraZeneca.
