Nag-abot na kaina sang aga ang 15,000 doses sang Sinovac COVID vaccines para sa ciudad sang Bacolod.
Nagikan sa Bacolod Silay Airport, gilayon nga gindala sa cold room facility sa Bacolod Government Center ang mga bakuna.
Mismo si City Administrator Em Ang, nga amo ang executive director sang Emergency Operations Center (EOC) kag coordinator sang COVID-19 Vaccination Council (CoVaC); OIC-City Health Officer Dr. Edwin Miraflor Jr.; kag EOC deputy medical Dr. Chris Sorongon ang nagbaton sang mga bakuna.
Gilayon nga nagpasalamat si Mayor Evelio Leonardia kay DOH-6 regional director Emilia Monicimpo sa pagresponde sa padayon nga request sang city government sang dugang nga mga bakuna.
Ginakabig man sang alkalde nga maayo ini nga balita bangud mas mapataas sini ang momentum sang vaccination program sang ciudad.
Ginpahayag naman ni Ang nga ang 15,000 doses nga nag-abot kaina sang aga ang dugang sa 60,740 doses nga nabaton sang ciudad halin sang bulan sang Marso.
Bangud sini, nagdangat na sa 75,740 doses sang Sinovac kag AstraZeneca vaccines ang nahatag sang national government sa Bacolod.
As of June 22, ang EOC kag ang CoVaC ang nakaadminister na sang kabug-usan nga 54,849 doses sang COVID-19 vaccines sa mga Bacolodnon.
Kaina sang aga, nagbaton man ang provincial government sang Negros Occidental sang pito ka boxes nga nagaunod sang 10,000 vials sang Sinovac vaccines.
Ini ang gilayon nga gindala sa cold room facility sang provincial government.
