Nagapatigayon ang Bacolod Permits and Licensing Office sang hybrid processing agud nga magrehistro sang mga negosyo sa ciudad sang Bacolod.
Sa interview sang Bombo Radyo Bacolod kay Stella Rose Rayos, pinuno sang Bacolod Permits and Licensing Office (BPLO), ginapatigayon nila sa karun ang pagproseso sang business permits sa online kag manual.
Ini kasunod sang madamo nga reklamo nga nabaton sang alkalde sang ciudad sang Bacolod gani nagdesisyon na lamang ini nga ihybrid ang pagproseso sang business permits.
Suno kay Rayos, as of January 12, may yara na sila sang narehistro nga 9800 ka mga negosyo sa ciudad sang Bacolod kag nakaissue naman sang 1100 ka mga business permits.
Suno pa diri sang 2023 nga data, nagdangat sa 25, 300 ka mga businesses sa ciudad ang narehistro kag mas mataas kumparar sang 2022 bangud 23,000 lamang ang business registered.
Suno kay Rayos, nagsaka ang business registrants sang 2023 bangud sa ginpasanyog nga pag-inspection sang mga ini kun sa diin may nasampulan kag may ginpangsiraduhan nga mga business establishments.
Suno diri, nakahibalo na ang mga pumuluyo sang ila nga mga obligasyon kag madamo sang mga buildings ang nagtululuhaw gani madamo man sang mga bag-o nga negosyo kag nagaparehistro sa ciudad.
Ginpahayag man sini nga mas mahapos ang magparehistro on line bangud magaclick lamang sang windows kag madasig lamang ang pagproseso.
Ang link amo ang ebpls.bacolodcity@gov.ph kag may yara lamang sang tatlo ka buttons nga iclick para sa bag-o magparehistro ukon magrenew lamang sang ila business permits.
Ang business registration ang tubtob lamang sa January 20 santo sa ordinansa sang ciudad magluwas nalang kun ipahanugutan sang Sangguniang Panlungsod ang extension.
