Ginpahayag sang station commander sa Bacolod Police Station 1 nga malapad ang ila prisuhan para mag-akumodar sa mga luyag magtuga sang gamo sa Masskara Festival 2024.
Sa interview sang Bombo Radyo Bacolod kay Police Major Elmer Bonilla, sa karun padayun ang pagtukod sang mga kiosk sa festival site partikular na sa palibot sang Bacolod Public Plaza.
Kahapon sila ang nagpatigayon na sang simulation sa pagpatigayon sang total closure sa dalan Rizal, San Juan, Gonzaga kag Gatuslao umpisa alas-4:00 sa hapon tubtob alas-5:00 sang aga.
Suno kay Bonilla, ang ila nga balantayan amo ang Public Plaza, Baywalk, Carnival kag Manokan Country.
Apisar nga wala pa sang nakaschedule nga activities sa ila area of responsibility, pasalig sini nga nakahanda ang Bacolod Police Station 1 bangod kun kaisa gulpyada man ang pag-abot sang mga VIPs.
Pahanumdom ni Bonilla sa mga festival goers nga likawan ang pagdala sang botelya sang makahulubog nga ilimnon, kag kun indi malikawan ini ang isulod nalang sa plastic.
Aminado ini nga indi nila makontrolar ang pagdumili sa pagpanigarilyo, gani pahanumdom na lamang sini nga likawan nga makalapak sang kinamatarong sang iban.
Ginalauman na ni Bonilla ang pag-umpisa sang pagdamo sang mga magalagaw sa Bacolod Public Plaza.
Panugyan sini nga mas maayo kun grupo kun maglagaw agud ma-intimidar ang mga salisi ukon pickpockets.
Pasalig sini nga sila ang may palibuton man nga mga kapulisan nga mahimo makaresponder sa kaangay nga mga insidente.
Suno diri, wala na nila gin-adoptar ang pagbutang sang prisuhan sa gwa para sa mga magatuga sang gamo bangod apisar nga ini ang makapugong sa kriminalidad, ini ang indi maayo sa mata sang iban nga tawo.
Apang pasalig ni Bonilla nga dako pa ang space sang ila prisuhan sa sulod sang Police Station nga mahimo hunungan sang mga violators.
