Ginpahayag sang station commander sang Bacolod City Police Station 1 nga may yara sang mga kapulisan nga nagabantay sa mga establishmento sa ila nga area of responsibility kag nagasaway sa mga bystanders kasubong man sa mga nagaliho-liho ukon may deperensya sa paminsaron ilabi na sa downtown area sang ciudad.
Ini ang kasunod sang report nga nabaton sang Bombo Radyo Bacolod nga may yara sang buang nga ginlampusan ang ATM machine sang isa ka bangko sa dalan San Juan, Bacolod City kag indi lamang makaisa sini ginhimo kundi makaduha na ka beses.
Sa interview sang Bombo Radyo Bacolod kay Police Captain Francis Depasucat, may mga police nga nakadeploy para sa police visibility.
Suno kay Depasucat, may yara sang mga police nga nagasaway sa mga bystanders apang ang mga mga nagaliho-liho ukon mga may deperensya sa paminsaron nga nagalagaw sa downtown.
Suno sa station commander, nakig-angot na ang mga ini sa Local Government Unit agud nga mabuligan sila sa pagsolbar sa problema sa mga may deperensya sa paminsaron nga nagaliho-liho sa ciudad bangud indi man sang mga ini madakop kag prisuhon kun may himuon kaangay sang pagguba sang ATM machine.
Suno diri, ang kinahanglan sang mga ini amo ang mabuligan kag mahatagan sang nagakaigo nga pagbulong.
