Gin-athag sang station commander sang Bacolod Police Station 1 nga indi hit and run ang natabo sa tunga sang driver sang Toyota Innova kag lady motorcycle rider sa Lacson-San Sebastian Streets, Barangay 32, Bacolod City sang Miyerkules sang gab-i.
Ang biktima ang ginkilala kay Angelie Pasman, 29 anyos, residente sang Purok 4, Magsungay, Barangay Singcang-Airport, Bacolod City kag isa ka female job order/casual employee sa Bacolod Government Center.
Ang driver sang MPV amu si Mhelvene Alfaras, residente sang Caroline Avenue, Brgy. Estefania, Bacolod City.
Sa interview sang Bombo Radyo kay Police Major Ramil Sarona, station commander sang Bacolod Police Station 1, indi hit-and-run ang natabo bangud nagsalpukanay ang Toyota Innova sang suspetsado kag ang motorsiklo nga ginamaneho ni Pasman.
Suno kay Sarona, wala nagpundo ang driver sang Innova posible bangud sa kakulba kag nagdiretso ini sa iya amay nga amu ang nag-upod sa iya sa pagsungka sa police station.
Suno sa station commander, nagpadulong si Alfaras kaupod ang iya amay sa police station pila ka minutos matapos ang aksidente dala man ang salakyan sini nga nakabunggo.
Santo sa ila imbestigasyon, lunsay madasig ang pagpadalagan sang salakyan kag motorsiklo base sa impact sang pagbungguanay sang mga ini.
Nakaistoryahanay naman ang pamilya ni Alfaras kag ni Pasman kag pagalantawon pa kun magapasaka sang reklamo ang pamilya sang biktima ukon sila ang magapasettle.
Sa karun yara sa kustodiya sang Bacolod Police Station 1 ang driver sang Toyota Innova.
Nagapanawagan naman ang pamilya ni Angelie Pasman sa kun sin-o man ang nakakuha sang helmet nga ginapanag-iyahan sang biktima nga iuli ini sa ila.
Sa post ni Aaliyah Pasman, nagahingyo ini sa kun sin-o man ang nakahimos sang SpydeR nga helmet nga may desinyo nga Tribal Skull kag nagaduag mixed Neon Pink, Blue kag Green nga iuli ini sa ila bangud tuman ini ka importante para sa biktima.
Suno diri, luyag nila ini nga bawion agud ipadala kay Angelie sa iya ulihi nga palahuwayan.
