Ginkompirmar sang station commander sang Bacolod Police Station 1 nga nag-umpisa naman sila sang paglimpyo sa dalan Gatuslao malapit sa central Market sang Hwebes, Hulyo 7.
Sa interview sang Bombo Radyo Bacolod kay Police Major Ramel Sarona, ginpahalin nila ang mga nagapark nga mga salakyan sa higad sang dalan kag ginpahigad man nila ang mga nakadisplay nga mga ginabaligya nga utan, isda kag prutas bangud sa naobserbaran nila ara na sila sa tunga sang dalan.
Suno kay Sarona, ginlimpyuhan nila ang dalan Gatuslao bangud nagagutok nagid ang trapiko diri ilabi na sa tion sang rush hours humalin sang alas 04:00 sang hapon tubtob alas 07:00 sang gab-i.
Suno sa station commander ila nga naobserbaran nga apat na ka mga salakyan ang nagaparking sa dalan kag ang mga nagabaligya duha na ka side sang dalan ang naoccupy gani gintinguhaan nalang nila nga mapahalin ang nagaparking kag mapahigad ang mga nagabaligya.
Ang nasambit nga tikang ang inisyatibo sang Bacolod Police Station 1 kun sa diin padayunon nila ini agud nga malimpyuhan na ang dalan Gatuslao malapit sa central market.
Nagpanawagan man si Sarona sa mga salakyan kag tricycle nga indi na magparking sa dalan kasubong sang mga vendors nga indi magbaligya sa tunga sang dalan agud nga indi maggutok ang trapiko.
