Preparado na ang Bacolod City Police Station 1 para magbantay sa isa ka Festival site nga ila nasakupan para sa palaabuton nga Masskara Festival 2023.
Sa interview sang Bombo Radyo kay Police Major Elmer Bonilla, station commander sang Police Station 1, ila gintukod ang Special Force Task Group para sa Masskara Festival agud bantayan ang nasakupan sini nga area ilabi na ang Bacolod Public Plaza nga nasulod sa ila area of responsibility.
Ang Police Station 1 ang estasyon nga mangin Task Unit Plaza para bantayan ang public plaza sa sulod sang tatlo ka semana nga selebrasyon sang Masskara.
Suno diri, target ni acting Bacolod City Police Office (BCPO) Director Police Col. Noel Aliño nga hilway sa ano man nga insidente ang mga festival sites.
Nagapangabay man ini nga mag-obserbar ang mga matambong sa pagsunod sa mga layi kasubong man nga nagpanugyan ini nga ginadumilian ang pagdala sang mga deadly weapons.
Ila man pagahugtan ang seguridad sa plaza sa pagtsekyar sang mga bag kag mga gamit nga bitbit sang mga pumuluyo kag kun sin-o man ang indi luyag nga magpatsekyar sang ila bag, indi ini pagpahanugutan nga makasulod sa Bacolod Public Plaza.
Nag-resquest man ang Police Station 1 sang dugang nga mga personnel para I-augment kag I-deploy sa paalabuton nga Masskara Festival 2023.
