Wala sang record ang mga kapulisan sang Bacolod Police Station 1 sa nagluntad nga kinawatay sang kabilya sa vendors plaza.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, nakita na sini ang video apang sang gincheck sini ang record, wala sang nagreport natuhoy sa insidente.
Suno kay Depasucat, bilang bag-o nga station commander sang Police Station 1, magapadayon ini sa pagtrabaho kun sa diin pagatutukan sang mga ini ang pagtumod sa mga nagapangawat, dakpon kag pasakaan sang nagakaigo nga kaso.
Isa man sa pagatutukan sini ang kampanya batok sa illegal nga druga bangud ini ang isa man sa mga ugat sang problema sa sosyodad.
Indi man bag-o kay Depasucat ang pagserbe sa nasakupan sang police station 1 bangud nakaagi ini diri nga nangin deputy chief of police.
Nahibaluan nga ginpatigayon ang pagbayluhanay sa tunga sang station commander sang Bacolod City Police Station 1 kag 4 sa ila tagsa ka mga Area of Responsibility (AOR), epektibo sini nga Martes, Nobyembre 5.
Ang station commander sang Bacolod Police Station 1 nga si Police Major Elmer Bonilla nga nagserbe sang kapin duha ka tuig ang ang ginsaylo sa police station 4 samtang si Police Captain Francis Depasucat nga nagserbe bilang Bacolod Police Station 4 station commander sang siyam ka bulan ang ginsaylo sa station 1.
Ginpasalamatan man ni Depasucat nga ginsaligan ini nga magpamuno sa Bacolod Police Station 1.
