Padayon pa ang imbestigasyon sang Bacolod City Police Station 10 agud matumod ang motibo sa pagpatay sa 55-anyos nga manugsagod sang baboy nga gintiro samtang nagasaulog sang iya kaadlawan sa Purok Saturn, Barangay Handumanan, kagab-i.
Nahibaluan nga ang biktima nga si Jose Estaniel ang nagaselebrar sang iya birthday kag bunyag sang iya anak sang nagluntad ang krimen.
Pagkatapos sang selebrasyon, nagpabilin si Estaniel sa lamesa sa gwa sang ila balay agud mag-istorya sa iya bayaw nga babayi sang naglabay ang ginabanta tatlo tubtob apat ka mga suspetado, ginluthang ini kag gilayon nga nagpalagyo.
Nakaangkon ang biktima sang igo sa tiyan kag dughan.
Sa interview sang Bombo Radyo kay Bacolod City Police Office spokesperson Police Lt. Ma. Liberty Indiape, masubo ini nga balita bangud nagasaulog sang kaadlawan si Estaniel sang ini ang gintiro.
Mahimo suno kay Indiape nga akig sa biktima ang mga suspetsado gani ginhungod gid nga kadtuan ang ila balay.
Subject pa man sa validation ang pahayag sang mga nakasaksi nga Toyota Avanza nga pula ang ginsakyan sang mga suspetsado nga nagabitbit pa sang sako sang ila nga gintiro si Estaniel.
Sa karon, wala pa nakahatag sang pahayag ang pamilya Estaniel bangud yara pa sila sa kasubo.
